الاثنين، 27 يوليو 2009

مــــشـــــــاركــــــة .... إجـــبـــاريــــة ... !!!

" ماكنت قاطعة امرا حتي تشهدون "..... و ..... " قضي الامر الذي فيه تستفتيان " ... غدا - الاربعاء - اخر ايام عملي في الادارة التي اعمل بها ... ساستمر في علاقتي التعاقدية مع المكتب لمدة 21 يوما نظرا لانهم لم يخبرونا بفسخ التعاقد سوي منذ ايام قليلة ... فسيتحملون مدة الشهر المنصوص عليها في قانون العمل ... لا اعلم هل هذا شئ محزن ...ام مفرح ؟ ...المشكلة ان الامور تسارعت ... وسارت في اتجاه غير الذي كانت تسير فيه ...لكن الحمد لله علي كل حال ..طبعا ساخبركم بما يستجد بعد " معركة " تصفية المستحقات - المادية - بيننا وبين المكتب ..في بدايات الاسبوع المقبل ... لا اريد احدا ان يتناول هذا الجزء في التعليقات - لاني اعرف كل الذي سيقال في موقف كهذا -... فقط اريد دعائكم بان يوفقني الله الي الخير حيث كان .. ثم يرضيني به ... وشكرا.
***
بما ان الكتابة هي الشئ الوحيد الذي يجعلني انصرف عن جميع ما احس به واعانيه لذلك قررت ان اشرككم في تجربة اتمني ان تنال اعجابكم
طبعا تعرفون ان هناك دعوة لـ " يوم للبهجة "... اطلقها الصديق " فاروق عادل ".. علي صفحات مدونته ... و اشتركت انا في الدعوة اليها ... وخوفا من عدم التفاعل من اصدقائي الاعزاء المدونين ... فقد فكرت ان اجعلهم يشتركون بالرغم منهم ... ستسألونني ...كيف سترغمهم علي الاشتراك ؟ ... ساقول انني انتقيت بعضا ..من المدونين ..الاشد قربا الي قلبي ... وساتخيل كيف سيكتبون في هذا اليوم ... فقط اريد ان تكونوا متأكدين ان هذة المحاولة ليست للسخرية علي الاطلاق ... ولكنها محاولة لتوضيح كم هم مقربون الي قلبي ... وكم انا متابع لهم في معظم - إن لم يكن جميع - تدويناتهم ... واعلن من الان لو ان ايا منهم ابدي غضبه من طريقة تقليدي لاسلوبه ... فسأمسح الجزء الخاص به من التدوينة ...وربما امسح البوست كله ... فانا لا اريد ان يتسبب شئ في تعكير علاقتي بهم ...فانا اعتبرهم مكسبي الحقيقي من دخولي عالم التدوين ... وسادخل مباشرة محاولا عدم الاطالة في التقديم ...وساذكر اسم المدونة في بداية كل بوست متخيل
***
***
انا سمعت من الصديق العزيز / المهندس عن دعوة " يوم للبهجة " ... طبعا انا احييه علي تلك الدعوة ... ولكن المشكلة اني مشغول جدا ... مشغول جدا جدا ..لدرجة اني ادخل علي المدونة فقط لمدة " ثلاثة دقائق ونصف " يوميا ... لذلك تكون فريق من " املي " و" راجول " ... وقرروا ان يبحثوا عن جميع الكتب الخاصة " بالبهجة " ...في مصر ..وطبعا اثمر هذا التعاون عن الاتي :- 1500 كتاب معظمهم لم يقم احد بقرائتهم من قبل ...فكما تعلمون اننا في مصر نفضل كتب " النكد " ..بعد ما انتهي " املي " و "راجول" ..من حصر الكتب وتحميلهم علي موقع الميديافاير .. دخلوا علي مكتبة الاسكندرية ... وبعدها مكتبة " الكونجرس " ... وقاموا بتحميل الكتب ... ..وساقوم بنشرها تباعا ...ان شاء الله .. بعد ما مكتبات الارض كلها خلصت ... وبما ان لديهم مجهودا وافرا ... فقد سمعوا ان هناك مكتبة كبيرة علي سطح كوكب " المشتري " ...وسيقومون باذن الله بتحميل الكتب الخاصة " بالبهجة " من تلك المكتبة ... وساقوم بنشرها في المجلد رقم 19125 في الفولدر رقم 5256 ... فقط ياريت حد يقدر يعد الفولدرات ... لاني الكومبيوتر المسكين بيشد في شعره من كتر الفولدرات ... وقرب ياجيله انهيار عصبي ... شكرا والسلام عليكم.
***
***
انا النهاردة جاي اكلمكم عن " يوم للبهجة " ..طبعا انا كنت مجهز صور عن مدرس الانجليزي ... اللي دخل الفصل علشان يدرسلنا الماني ... بس للاسف الموبايل ضاع ... اللي يلقي الموبايل .. يجيبهولي ومش مهم الصور ياخدها وينزلها علي مدونتة ... طبعا الصور الجديدة مش زي الاولانية الجديدة فيها مدرس الفيزياء ...بيدرسلنا العاب ..اهه الالعاب فيها فايدة اكتر من الفيزياء ... انا مش فاهم لحد دلوقتي... ايه فايدة... مادة زي .. " الفيزياء "... سوي انهم يعذبوا الطلبة الغلابة ... وبعدين انا زهقت من شكل المدونة بتاعتي ... وعاوز اسيبها و اؤجر مدونة قانون جديد بس بشرط تكون ... بحري .. انا طبعا كنت عاوز اكلمكم عن " الواد الرخم " ابن احد المدرسين ...اللي بيدخل يسيب تعليقات " رخمة " زيه ...بس مش هقدر ... اصل انا اي حد بأجيب سيرته في تدوينة ..لازم وحتما ولابد ... يحصله حاجة من اتنين يا يموت ... يا ينتحر ... وده مش ينفع ..احنا في يوم البهجة ...وبعدين انتوا عارفين اني مشغول ..وفي 3 صحافيين مستنيين في الصالون ...واحد من " الواشنطن بوست " والتاني من " الصنداي تايمز " ... والثالث من " وكي وكي ..تاتا " دي صحيفة صينية ... المهم اسيبكم دلوقتي يالا باي ... اه محدش يدخل يسيب تعليقات ... ولو ساب مش هرد عليه ... هو انا فاضي ..انا مسافر شرم ... وبعدها هطلع علي البحر الاسود ... قدامكم المدونة ارغوا فيها زي ما انتوا عاوزين ...انا مش هرد عليكم ...سلام .
***
***
قال ... يوم " للبهجة " قال ... المهندس ده فاضي ... اساسا انا وقفت قدام المراية ...اللي طولها 3 متر ... اتأمل نفسي ...متذكرا ... نسائي ... ومتمما علي احدث انواع العطور التي اشتريتها ... متذكرا احداث يوم " البهجة " العام الماضي ... كان يوما مشهودا ... انتم تعلمون اني اكره الصيف ... بسبب رياحة " الشمالية الغربية " ... وانتم تعلمون اني افضل الرياح " الجنوبية " ... اسقني واشرب علي اطلاله ... ياااااااه ... اضحكتني يا رجل ... كان يوم البهجة يوما مشحونا في العام الماضي ...وساحكي لكم كيف ...فقط اللي سيقاطعني ...ستكون فرصة ... اوضح له اني اتمتع بمواهب اخري سوي التدوين .
استيقظت في يوم " البهجة " .. العام الماضي ظهرا ... وانت تعلمون كم امقت النهار ... فانا اتمني ان تكوون الدنيا كلها ليل ...زي الصورة اللي حاططها علي مدخل المدونة... المهم بعد النشاطات اليومية ..لبست افخر ثيابي ..و" تمضخت " بافخر عطوري لهذة المناسبة .. ونزلت متمشيا من اول فيصل ... وعرجت علي شارع الهرم ... ومنه علي 6 اكتوبر ... وبعدها مشيت علي المحور ... حتي كورنيش النيل ... لاستمتع بنسيم الليل البارد ... رن عليً " منصور ... " وكان واضح ان جنبه " طارق ... " ... بس نفضتلهم ... وانا راجع كده الساعة 5 الفجر ... قلت لابد من ممارسة هوايتي اليومية ... وجدت مجموعة من الشباب الغارقين في سحب الدخان الازرق ... فقمت بالواجب معهم ...وتركتهم ليقوم الجيران باستدعاء سيارات الاسعاف ..ومشيت مردد كلمات " نزار " ... بس خلاص ...اه اللي عاوز يعلق ... يدخل يسيب تعليقه ويبقي يدور عليه بعد اسبوع ... هو انا فاضي اشوف التعليقات كل شوية ... " محمد الماغوط "
***
***
عندما هرب القلب ...من البهجة .. وجري ورائه.. الحلم ..وطاردهما الفأر .. ومن ورائهم القط ... وتركهم الكلب لانه كان حزينا ... حد بقي يفهمني .. احنا ليه بنعمل يوم للبهجة ؟ .. يعني انتوا شايفين ايه اللي يسعد في دنياكم من اساسه ؟ ... وبعدين انا حلمت حلم غريب .. وعاوز حد يفسره ... بس خلوا بالكم الحلم كان بالابيض والاسود لانه حلم قديم ... لقيت " الخديوي " عباس ... بيسلم علي امين عام الامم المتحدة .. وبيقوله يبلغ " هتلر " انه مستعد يخلي " فاروق " يدخل معاه.. الحرب .. بس بشرط انه يمنع قيام دولة اسرائيل .
طبعا الاحلام الغريبة دي اللي " بالابيض والاسود " بتاجي في اليوم اللي بأعدل المدونة 5 مرات فقط ... اصل انا في المعتاد ... بأعمل 3 مدونات في اليوم ... واغير قوالبهم 19 مرة فقط ... لكن مش مهم ... انا هنشر النهاردة عن .. " انيس منصور " ... المعلومات من " زيكوبيديا " ... يعتبر انيس منصور ... واحدا من ...... وهو ...... ودخل الجامعة ...... وعمل ...... وسوي ...... وجايبلكم 900 كتاب من تأليفه ... بس ياريت تقدروا تكملوا البوست لحد الاخر .... وبعدين اللي عاوز يعلق ... يعلق براحته ... انا مرات بأرد في نفس اليوم ... ومرات بعد 3 اشهر ... مش مهم ... مدونتي وانا حر فيها ... يالا سلام.
***
الاخت العزيزة / زمان الوصل .. سمحت لي " بمعارضة " طريقتها في التدوين
***
تلقيت دعوة للمشاركة في " يوم للبهجة " ..في البداية لم اكن متحمسة للمشاركة ... فلم يحن موعد تدوينتي ..فكما تعرفون اني اقوم بالتدوين مرة كل 3 اشهر .. ولكن عندما وجدت الموضوع يكتسب " زخما " - انا باحب الكلمة دي - فقلت لا بأس من الاشتراك في دعوة " البهجة " ... بس المشكلة اني كنت في ندوة عقدت بالبنك " المركزي " في مبناه الجديد .. وعرفت بالصدفة ان الحكومة عرفت بموضوع " يوم للبهجة " فقررت ان تشارككم في البهجة عبر تطبيق المفهوم " الحكومي " للبهجة ... وهو برفع اسعار الاقراض 19% ومع خفض اسعار الفائدة 30% ..مش مهم تعرفوا يعني ايه ... لكن اوعدكم حياتكم هتكون اكثر سوادا ... عند تطبيق " المفهوم الحكومي للبهجة "
انا بهذة المناسبة ... حضرت مجموعة من الافلام الخاصة " بالبهجة " ... بدءا من " سفير جهنم " .. و " العار " .. و " النظارة السوداء " .. انت تعرفون طبعا انني اكره التمثيل المبتذل للخير .. لذلك اعجبني جدا " يوسف بك وهبي " عند تمثيله لدور الشيطان في " سفير جهنم " .. فعلا قمة الاداء التوافقي التبادلي في دور ابليس ... حاجة تفتح النفس .. ولا " عبد البديع العربي " في " العار " ... اهه الادوار اللي ترسخ للشر بجد ... اما اكتر حاجة عجبتني في فيلم " النظارة السوداء " فكانت ... " النظارة نفسها " موديل شيك ..وغالي ... اما بقي الحاجات ...اللي مش بتعجبني .. فهي ادوار الخير .. سواء في السينما او التلفزيون ... خير ايه ؟ هو فيه خير اليومين دول ؟ .. قال يقولك " ماما نونا " ... ولا فيلم الحفيد ... ولا " احمد حلمي " ... الشررررر هو الذي يكسب في السينما ... فوقوا من غفلتكم السينمائية .. في يوم البهجة القادم ساحدثكم عن واحد من اكثر السلاسل المثيرة للبهجة في السينما العالمية .. وهي سلسلة "Saw " .. شكرا والسلام عليكم .. بالنسبة للتعليقات انا بأجمع التعليقات ... وبأرد عليها اربع مرات في السنة ... اترككم في رعاية الله.
ملحوظة : دورت علي صورة " عفريت " احطها علي رأس التدوينة ..بس مالقيتش غير دي اللي العفريت فيها من غير رأس .. فبقي " عفريت " مرعب بزيادة ..ابقوا ورها للاطفال عشان يسمعوا الكلام .
***
طبعا هناك ... اصدقاء اعزاء اخرون ... ولكني اخاف ان " اعارض " طريقتهم بالكتابة ... فيغضبون مني ... ومنهم الاخت العزيزة " زمان الوصل " ... والصديق العزيز " واحد من العمال " ... وصديقي المهندس " أبو العريف " ... وكما ان هناك اخرون ... ولكنهم لا يشرفونني بزيارة مدونتي ...لذلك ليس من الادب ان اقلدهم في غيبتهم ... اما الذين قمت اليوم " بمعارضتهم " في طريقة التدوين ... فاعلم ان ما بيننا من العلاقة سيشفع لي في حال غضبهم مني ... وان كنت اتمني الا اكون تسببت في اغضابهم " بغلاستي " .
***
دلوقتي بقي المفاجأة ... شوفوا الاخير ده اللي هقلده
المهندس " ده انا "
***
تحديث : 90 زائرا .. و 120 زيارة ... ولم يشترك احد في استطلاع " يوم للبهجة " ... فعلا انه شئ " مبهج " للغاية ... انا اساسا قررت الامتناع عن التدوين 5632 مرة .. ولكن ساحاول ان اضغط علي اعصابي .. وابتهج معكم في هذا اليوم .. وبعدها سيكون لكل حادث حديث ... شكرا ( ملحوظة قارب رصيدنا من النقاط علي النفاذ من كثرة الاستخدام )
لا اعلم ان كنت مصيبا ام خاطئا بالاشتراك في الدعوة لـ " يوم للبهجة " .. بهجة ايه ؟ وانا لسه من كام يوم منزل بوست باسم " اعراض اكتئابية " ... وبعدين لو تعرفوا انا قعدت قد ايه احضر للبوست ده - يعني خلوا في عينكم حصوة ملح وشاركوا في الاستطلاع والتعليقات - ... وبعدين اساسا الشغل ظروفه ملخبطة ... وحياتي غير مستقرة ... وانا مش باحب حد يزعل مني .... فعشان كده هقعد اكتب بوست طويل ..طوييييييييييل ... واللي مش هيقراه ... هدخل بعد يومين اتخانق معاه في التحديث .
ثم ازاي يكون في يوم " للبهجة " .. وملالي ايران ... كاتمين علي " نفس الشعب " .. اساسا ايران دولة " فاشستية " ... واليمين هناك ..هو فقط اللي متصدر الصورة ... فالصراع هناك يتم بين اليمين المتطرف واليمين المحافظ ... ابقوا فكروني اشرح الفرق بينهم في تدوينة طويلة ..محدش هيقراها ..ولا هيعلق عليها .
انا مبقيتش عارف ..اكتب عن ايه عشان المدونة تعجبكم ... ثقافة مش نافع معاكم ... سياسة ..مش بياجيني منها غير الشتايم و " الردح " ... استطلاعات واستفتاءات ..مفيش حد بيشارك ... واللي يدخل مرة " يهج " وميدخلش تاني ...حرام عليكم ... في الاخر ..هتلاقوني ...ماسك في ايدي سيف خشب ..وواقف علي باب المدونة ... زي " مجاذيب " السيدة
انا هحط كلمة " يتبع " في نهاية التدوينة ... وانتوا عارفين الكلمة دي سرها " باتع " مفيش مرة احطها الا وتحصل مصيبة تخليني لا اعرف اكمل اللي ابتديته ... ولا اكتب حاجة جديدة ... لذلك اي تدوينة تلاقيني حاطط فيها " يتبع " ... اعرف انك مش هتابع حاجة ... وبعدين اساسا الطبقة الوسطي ... اللي هي " البرجوازية " العاملة .... في صراع دائم مع " النخبة " ... وهما الاتنين ... يجب ان يكون هناك متنفس ... يستوعبهم اما من يسار الوسط ... او من الوسط من غير يسار ... وبعدين " عمارة يعقوبيان " كتبت عنها ... بوست ... مطول ... انه حد يقراه او يقول كويس ولا وحش ...ابداااا ... مش باقلوكم انا هتجنن علي اديكم .
روابط مفيدة : طبعا البرنامج الرائع " العاشرة مساءا " والمذيعة المتألقة " مني الشاذلي " اللي كل ما اقعد ادون يفوت عليا البرنامج بتاعها ... بسبب اني مش باعرف اكتب وفي اي صوت بجانبي .. فاقوم بكتم الصوت ... واضيع البرنامج عشان خاطركم ... وياريت بياجي بفايدة في الاخر ... وبعدين محاولاتي الادبية المتعثرة دي اعمل فيها ايه ؟ ليه مفيش 200 او 300 تعليق ياجوا يناشدوني ان انزلهم زي ما هما ... لاء وقال ايه ... خايف من سرقة الاعمال الادبية علي شبكة الانترنت ... ده علي اساس انه " نجيب محفوظ " ... هنبقي نجيبلك " ادهم صبري " يحرسلك المدونة من السرقة .... شكرا والسلام عليكم
يتبع
***
شكرا ... والسلام عليكم ... وتصبحوا علي خير ..... مفيش يتبع ... انا مش ناقص مصايب
***
إضافة : ..الحمد لله .. يبدو ان عدوي السعادة بدأت بشائرها في الانتشار علي المدونات ... فهاهي الاخت العزيزة / أليس في بلاد العجائب ... تنزل ببوست ..ولا اروع ... تحت عنوان / اضحك الله سنك :) 2 ... مع هذا البوست .. اوعدك ... مش هتقدر تغلق فمك ..من كثرة ..الضحك

هناك 24 تعليقًا:

فاروق عادل يقول...

هههههههه بوست تحفه يا بشمهندس بالذات فى تقليدى انا وانت وكائن الابداع بجد روعه
متقمص لاسلوبى بطريقه جميله
------------
بالنسبه لحوار التعليقات اصبر بس كدة انت شهر ولا شهرين وشوف حماسك للرد على التعليقات هو هو ولا اتغير

المهندس يقول...

انا اساسا قلت مش هنام غير لما اقرأ تعليقك ... مش عارف كنت عارف انك هتاجي اول واحد .
ايه رأيك في " وكي وكي ..تاتا " ..الصحيفة دي ممتازة .. بيعملوا مواضيع هايلة .. بس المشكلة انها بالصيني ..وانا مش باعرف اقراها.
انا عرف انك راجل مشغووووول ...مش زيي فاضي ... ربنا يعينك .
لما تكبر وتبقي فاضي زيي كده ابقي رد علي التعليقات
شكرا علي التعليق ... ووبجد اول مرة اكتب حاجة تضحكني بالدرجة دي ... انا عمال اضحك انا وبأرد عليك ... ايه اخبار البحر الاسود صحيح ... فين الصور بتاعته ... اوعي تكون ضيعت الموبايل
بجد اتمني انك متكونش زعلت ... لاني حاطط ايدي علي قلبي خايف اكون غلست علي حد ... السلام عليكم
يتبـــــع

كائن الإبداع .... محمد يقول...

هههههههههه


تعديل بسيط * : أناا بعدل المدونة 17 مرة في اليوم ، و في الحالة دي بيجيلي حلم ألوان و عليه أوكازيون الصيف .و في حالة تعديلها 20 مرة باخد أرباح أكثر من Adsense علشان أنا - و على رأيهم بتوع جوجل - مهووس بالتعديل Editing obsession >>>>> و بعدين ما تعرفش اني جاسوس و من مخابرات جوجل العامة




ليك يوم يا ظالم ..... ليك يوم يا ظالم

الكلمة نور يقول...

هى بقت كدا يا هندسة
وصلت للتقليد
طب يا معلم قابل
هاستناك انا ومنصور وطارق
وهانى الدغل وسيد الحافى فى المطار
ولا هترجع مركب
نستناك فى المينا
مافيش ادنى مشاكل يا معلم
ضحكتنى تانى ودى حاجة تحسبلك
:))

المهندس يقول...

الصديق / كائن الابداع
دا انت اساسا محظوظ اني ما دخلتش اخر موضوع " بتاع الزواج " هنا ...والا كانوا هيروحوا بيك المستشفي مصابا بحالة شديدة من " الضحك "
اه عشان تعرف دي حاجة كده ...علي الماشي ... لكن لو مبطلتش البوستات الغريبة ... هيكون في اشد من كده
بجد شكرا علي تقبلك للموضوع بروح رياضية ... بس مقلتش رأيك في اخر واحد انا قلدته " المهندس " ...ولا ملحقتش توصل للجزء ده عشان تقدر تعمل التعديل رقم 5426 في المدونة ؟
شكرا ... والسلام عليكم
يتبــــــــع

المهندس يقول...

الصديق / الكلمة نور
حبة مش جد
لالالالالالالالا كله الا " الحافي " ... انا كده هرجع عن طريق رأس الرجاء الصالح احسسسسسسسسسن
حبة جد
اولا : تنفست الصعداء عندما لم تبد غضبك من المحاولة ... فانا منذ نشرت البوست وانا خائف ان يتسبب في اغضابك ... فالقصر - النسبي - في فترة تعرفي عليك لم يجعلني متأكدا من طريقة رد فعلك ... ولكن كان من الصعب تخطيك في محاولة كهذة ..فانت واحد من الذين اتابع مدوناتهم باستمرار ...كما ان لديك اسلوبا مميزا في استخدام الفصحي ... يجعل لها وقعا محببا عند القراءة - كما ذكر احد زوار مدونتك - كما انك تصنع تنوعا في البوستات فمن تجاربك الخاصة ..تعرج للشعر ... ومنه للخواطر ..فمن الصعب ان يتنبأ اي شخص بنوع البوست القادم عندك
ثانيا : رغم هذا احس انك غاضب - بعض الشئ- من محاولتي ..واكرر انها محاولة لاظهار الاهتمام ..وللمداعبة مع اشخاص مقربون لقلبي ..فلو ان هناك شيئا اغضبك ..مستعد لمسح الجزء الخاص بك مباشرة
ثالثا : لو تعرف مين اخر واحد انا قمت بتقليده " المهندس " ..ابقي قلنا رأيك ...هل عرفت ان اقلده ام لا ؟
رابعا : ايه رأيك في شوية التمشية من " فيصل " ذهابا الي "6 اكتوبر " ..وايابا الي " كورنيش النيل " ... اظن اللي يمشيها هيقعد في المستشفي لمدة شهر
شكرا ..والسلام عليكم
يتبــــــع

فاروق عادل يقول...

ازعل من ايه بس بجد تقليد ممتاز

زمان الوصل يقول...

لا والله ماكنتش هازعل لسبب بسيط :) إنّى عندى قناعه إن الواحد عشان يتقلّد محتاج يبقى عنده لزمات كلاميه أو حركيه و أظن إنّى معنديش .. بس على أى حال طبعا ماكنتش هازعل لأنّى متأكّده إنّه كان هيبقى مزاح لطيف و باعث على "البهجه" .. على فكره اختيار يوم 10 أغسطس يوما للبهجه يتفق تماما مع جدولى لأن يوم 11 أغسطس إن شاء الله سأخرج مع زملاء العمل فى فُسحة وداع قبل تركى العمل لمكان آخر و هى بالطبع مناسبه هى كمان تبعث على البهجه .. سبحان الله شكلنا فعلا هنبتهج فى اليوم ده غصب عنّنا :)

المهندس يقول...

الاخت / زمان الوصل
كنت اعلم انك ستوافقين .. حيث اعلم انك ذات عقل منفتح ... ولكن حرصا علي عدم اغضابك ..كنت حريصا علي الاستأذان اولا
اذن ترين انني لن انجح في " معارضة " طريقتك ... اذن شرفيني بالدخول مرة اخري في غضون الساعات القادمة ... وطالعي التحديث لهذا البوست ... وشاهدي هل ساعرف ..ان " اجاريك " في طريقتك للتدوين ام لا ... فقط ارجو الا تغضبي مني .. ان كان ادائي " سيئا "
لا اعلم هل تركك لعملك مناسبة " سعيدة " ... ام لا ؟ ... ولكن كما واكيد اطلعت علي بداية المدونة ... استطيع ان اخبرك " نحن السابقون ... وانتم اللاحقون " ادعو الله ان يوفقك الي كل خير .
شكرا والسلام عليكم
ملحوظة : لابد وان تشتركي في التدوين يوم 10 اغسطس ... وتتركي حالة الصمت " التدويني " التي تفريضنها علي نفسك ...دمت دائما بخير ... السلام عليكم
يتبــــــع

المهندس يقول...

الصديق / فاروق عادل
اسف مش اخدت بالي انك سيبت تعليق تاني
شكرا علي ثائك ..ومديحك .. واكرر انني لم اصنع هذة المحاولة سوي للمكانة الكبيرة التي تحتلها ... ويحتلها جميع من قمت " بمعارضة " طريقتهم في التدوين
ربنا يوفقك ويكرمك ... انا عارف انك بتدون بنص عقل .. ونص تفكير ... لكن انشاء الله خيرا .
اه صحيح الصحفي بتاع " وكي وكي ..تاتا " غديته ايه ؟ انت عارف الجماعة الصينيين ... مش بيحبوا غير " السحالي " علي الغدا " يععععععععع " .. عندك سحالي عشان تغديه ؟ ولا ابعتلك شوية ؟
سلالالالالام

أميرة يقول...

" تمضخت "

الكلمة دي حطيتها عامدا متعمدا زيه كده لما بيعذبنا بكلمات نحتاس في معناها ولا انا اللي مش فاهم !!


اضحك الله سنك ومتشكرة علي اضافتك للتدوينة - علي فكرة ليها جزء اول لو تحب تستزيد من الضحك :)


ابقي ارجع بالبر واضح انه معندوش اعوان في الصحرا ..

ربنا يسعدكم جميعا

المهندس يقول...

الاخت / اليس
شفتي ..انا اساسا كاتب الوست ده كله علشان " تمضخت " دي
بس انا عاوز اعرف برضه ايه رايك في اخر واحد قلدته " المهندس " عرفت اجيب اللي في دماغه ...ولا جاملته ؟ علشان انتي عارفة اننا اصحاب
شكرا لزيارتك ... واهتمامك بالتعليق ...السلام عليكم

أميرة يقول...

ما انا رديت عليك عندي لما قولتي

تقليدك للمهندس يشبهه كتير وخصوصا وهو ماسك المايك و محموق :)

احسنت

دا رابط الجزء الاول اللي قلت عليه : اضحك الله سنك 1http://ahmnkyadonia.blogspot.com/2009/02/blog-post_17.html

أميرة يقول...

وعلي فكرة ممكن تبلغ المهندس ان الكلام في الادب كان كويس وابن ناس و سكته خضرا ان شاء الله

وبالنسبة للاستفتاءات .. غالبا الشعب بتاعنا عنده حساسية من الكلمة والفعل .. وواخد مضادات تزويرية عمر بحاله .. فاسمحلي مش هتيجي عندك و عقده لسانه تتحل ويدوس علي اختيار .. دا محتاج فك الربط اللي معموله الاول :)

و اسمحلي بردة تقول للمهندس بالهداوة .. اعصابك .. اكيد في بشر في حياتك عايزينك .. متزعلش نفسك علي رد فعل كنت مستنية ومجاش .. لعله خير .. و يمكن يجي يوم وتقول والله كنت بعمل حاجة كويسة و بلاها يتبع اللي مزعلاك دي .. ابقي اكتب انتظرونا .. ولا اي حاجة اقتباس من القنوات المهفوفة الي ماليه الدنيا :) و مفيش مانع تنزلهم اعلانات و مشاريب بين الفقرة والتانية .. اهو تشجع صناعات بلدك و تدعم الحكومة الغلبانة

واشكرك علي الابتسامة الصباحية اللي حلت علينا مع الفاصل اللطيف دا

المهندس يقول...

الاخت / أليس
سيتم ابلاغ "المهندس" بما طلبتيه ... هذا اذا لحقته قبل ما يحصله " لطف " ..وتلاقيه ماسك سيف خشب و واقف علي باب المدونة زي مجاذيب "السيدة" .
مسكين ..كل ما يكتب " يتبع " يطلعله عفريت .... وبعدين انت عارفة تحالف اليمين اليساري البرجوازي النخبوي التعبوي ضده ...عشان كده موقفين اتنين مخبرين ...علي باب المدونة... بيطفشوا الناس اللي داخلين المدونة ...وبياخدوا منهم الاقلام ... عشان كده الناس مش بتعرف تكتب تعليقات ... ولا يصوتوا " يا لهووووووووي " في الاستطلاعات.
شكرا ...والسلام عليكم
يتبع

أبو العريف يقول...

هندسه

لا يا باشا ولا يهمك
عارض براحتك

المشكله اني فاكر اني علقت هنا قبل كده

مش عارف النت اللي بيهيس
ولا الزهايمر اللي شغال

عموما انا مبسوط انك كنت عايز تعارضني


ثم هما ال .5 في الميه دول جوم منين

المهندس يقول...

الصديق " ابو العريف "
انا متهيألي النت بيشتغل ...
والزهايمر بيهييس
ايون كده ..اضفت مدونتي ... كنت ناوي اسوي " جنجااااار " سوا سوا معاك صديق
0.5 دول نقصتهم لاختلال القافية في المقطع التالت ... لولا كده ..كنت اخدت 10/10 ... ممتاز ونجمة ... وحاجة ساقعة من المقصف كمان
شكرا لموافقتك علي اني " اعارضك " في طريقة التدوين ... بس هنأجلها للجزء التاني ... عشان البوست بقي طويل ... وانت عارف المرور بيشترط طول معين في البوستات ..خصوصا اللي بتتكتب بالليل
المشكلة انك " موهوب " ...وتدويناتك معظمها شعر ... بس هحاول ... وارجو الا تغضب مني اذا اسأت في المحاولة .
انت علقت صحيح ... بس في البوست السابق ... صديق انت ما في كتير وقوف في شمس ... كده في كتير تكليف بالليل عند نفر حق مدونة .
شكرا ... وتصبح علي خير

زمان الوصل يقول...

ههههههههه ..
أُقرّ إن فيه مجهود غير عادى اتبذل فى كتابة التدوينه دى ولو كنت حاولت أكتبها بنفسى ماكنتش عملتها لطيفه كده :) أنا حاولت أرد على سؤال
"لماذا لا أدوّن بكثره" فى البوست قبل الأخير بس مش عارفه ليه التعليقات بدت كأنّها معطّله .. و فعلا أنا عندى مشكله فى الرد على التعليقات خصوصا لو حملت ثناء أو مديح فعلا بتعمل لى ما يشبه التربنه و مش باعرف أرد .. بس على فكره فيلم زى
saw
و ما على شاكلته من الأفلام الدمويه يستحيل أشوفه ولو دفعوا لى فلوس :) أنا مش باتفرّج على الشرّ اللىّ للشرّ بس ده لازم يكون موظّف دراميا زى الممثله اللىّ اتكلّمت عن البوس الهادف فى الأفلام و اللىّ بيكون موظّف دراميا بردو :)) بس بجد أنا هاحتفظ بالتدوينه بتاعتك / بتاعتى دى لأنّها من الحاجات الفريده جدّا بالنسبه لى فى عالم التدوين ..

آه أنا مبسوطه إنّى هاسيب شغلى لشغل آخر حتى لو كان بمرتّب أقلّ بس أنا محتاجه لهذا التغيير بشدّه .. و محتاجه أتعلّم حاجات جديده أدعو أن يكون التحاقى بالشغل الجديد سبيلا لها ..

على فكره أنا ناويه أكتب تدوينه مبتهجه -إن شاء الله- عن هذا اليوم التاريخى الذى سأترك فيه عملى بعد ست سنوات و نصف لعمل جديد .. و ربنا يوفّقنا جميعا لما فيه الخير دائما .. السلام عليكم

المهندس يقول...

الاخت العزيزة / زمان الوصل
شكرا جزيلا ..واحمد الله ان التدوينة اعجبتك ... بس ايه رأيك في " قمة الاداء التبادلي التوافقي " " ...انا مش عارف جبتها من فين !!!
اعرف انك لاتحبين افلام مثل saw فتلك ليست بافلام ... ولكن كان لازم شوية تضخيم للامور في التدوينة ...عشان الصورة تكون " كوميدية " بعض الشئ.
يا لهوي للحكومة تسمع التدوينة دي وتطبق اللي فيها ... تبقي مصيبة ... تخيلي يخفضوا معدل الفايدة 30% ... دا انا هرجع مصر الاقي نفسي مديون للبنوك.
وبعدين مقلتيش العفريت كان شكله ايه وهوه من غير رأس ... يا ماماااااا ..دا يبقي رعب بشكلللللل .
سعدت - مرة اخري - بقراءة تدويناتك مجمعة امس قبل شروعي في الكتابة .. واتفق معك ان مرات الشر يكون مرسوما بعناية في الدراما اكثر من ادوار الخير ... فنحن نخلط - غالبا - في الدراما ما بين الطيبة والسذاجة ...ومرات الهبل ... فليس معني ان اكون خيرا ان اكون " متسهوكا " طوال الفيلم ... او عبيط ...وفي الاخر انتصر ... طيب ازاااااااي ؟
علي فكرة انا معجب بجد بـ " عبد البديع العربي " في فيلم العار ... وخصوصا وهو بيقول " ما هي دي الصدقة المخفية ".. في اول الفيلم ... لا اعتقد ان احدا يستطيع تكرار تلك الجملة سوي بنفس اسلوبه - رحمه الله -
اطلت في الرد ...ولكن اكرر انا سعيد بان تدوينتك/ تدوينتي ... اعجبتك ... شكرا ... والسلام عليكم
ملحوظة : نسيت ان تقولي لي رأيك في طريقة تقليد " المهندس " .. وهل نجحت في تقليده ؟ ..ام قمت بمجاملته ...لسابق المعرفة بينا

المهندس يقول...

استدراك : الف مبروك علي انتقالك للعمل الجديد ..حتي ولو بمرتب اقل .. اهم شئ انك ستكونين سعيدة فيه ... فالمادة ليست كل شئ .
فقط المبني الجديد للبنك المركزي سيفتقد زياراتك له .
ارجو ان تدعي لي انا ايضا بان اجد عملا اكون سعيدا به ...- بس بلاش حكاية الراتب الاقل دي معايا انا - احسن اقل من كده ....يبقي حرااااام
شكرا والسلام عليكم

غير معرف يقول...

تدوينة رائعة وجميلة جدا فعلا
اعجبنى جدا تقليدك لى وضحكت جدا مع العلم
انى لا اضحك بسهولة
الفكرة جديدة ومجرد تنويعك لتدويناتك يجعلها متميزة.
اتمنى لك التوفيق دائما

المهندس يقول...

الصديق العزيز جدا جدا / رولكس (نهضة العرب )
ياااااااااااااه .... هذا هو وسام شرف اضعه علي صدري ... انك اعجبت بطريقتي في تقليد اسلوبك في التدوين .
تصدق بالله ... انا كنت في شبه حالة اكتئاب خوفا من اكون اغضبتك بما فعلته .
شكرا جزيلا ... واتمني ان اعرف راي بقية فريق " نهضة العرب " ...ويجب ان تعلموا اني لم افعل ذلك سوي لمكانتكم المتميزة عندي
اتمني زياراتك الدائمة والمستمرة ..دمت دائما بخير ... والسلام عليكم.
ملحوظة : اتمني ان اسمع رأيك في طريقة تقليدي " للمهندس " وهل عرفت ان اعارضه في طريقته ....ام تغاضيت عن بعضا من لزماته ...بسبب سابق المعرفة بيني وبينه ؟

!!! عارفة ... مش عارف ليه يقول...

بصراحه البوست ظريف جداااا

وبالرغم من أني معرفش أصحاب المدونات دي

إلا إني تخيلت اصواتهم وهي بتتكلم من اسلوبك المعبر جداااا

وإن شاء الله يكون يوم لطيف فعلا

وكل سنة وأنت كل أيامك بهجة :)


وليد

المهندس يقول...

الصديق العزيز / وليد " عارفة ..مش عارف ليه "
شكراااااا علي مجاملتك الرقيقة ... وشكرا اكثر علي حرصك علي مطالعة جميع التدوينات ... والتعليق عليها.
علي فكرة ... انت لك نفس درجة الاعتزاز والتقدير عندي ... ولكن لم اقم بتقليدك لسببين ...اولهما : خفت الا يروقك هذا ..وتغضب منه , ثانيهما : انك لا تدون عن نفسك كثيرا ...فهذا كان مما سيصعب المهمة عليً في محاولة تقمص اسلوبك
سيكون يوما لطيفا... باذن الله .. عندما تشارك انت فيه ... وعندما تدوام علي زيارة مدونتي التي تزدان فرحا بتشريفك لها
شكرا صديقي ... وادام الله عليك ادبك الجم وحرصك علي اسعاد الاخرين ...والسلام عليكم