الأحد، 16 أغسطس، 2009

" قــــــد اظــــــلـــــكــــــم شـــــــهـــــــر "



بسم الله الرحمن الرحيم

" شهر رمضان الذي انزل فيه القرآن هدي للناس وبينات من الهدي والفرقان "

صدق الله العظيم

روي عن رسول الله " صلي الله عليه وسلم انه قال " يا ايها الناس قد اظلكم شهر كريم عظيم مبارك .. شهر فيه ليلة خير من الف شهر , جعل الله صيام نهاره فريضة , وقيام ليله تطوعا , من تقرب فيه الي الله بخصلة من الخير كان كمن ادي فريضة فيما سواه ..... "

وعنه - عليه افضل الصلاة واتم التسليم - انه قال " إذا كان أول ليلة من رمضان صفدت الشياطين ومردة الجن، وغلقت أبواب النار فلم يفتح منها باب، وفتحت أبواب الجنة فلم يغلق منها باب، وينادي منادٍ: يا باغي الخير أقبل، وياباغي الشر أقصر، ولله عتقاء من النار، وذلك كل ليلة "

والاحاديث في فضل رمضان كثيرة ومعروفة ... نسأل الله ان يبارك لنا في شعبان ... وان يبلغنا رمضان ... وان يجعلنا جميعا من عتقائه من النار في هذا الشهر

وانا انتهز هذة الفرصة - علي اعتبار اني انتهازي كبير - واسوق لكم جميعا احر التهاني ... واشد التمنيات ان يعيده الله عليكم اعواما عديدة ... وسنوات مديدة ... وانتم جميعا في اتم صحة واحسن حال ...دينيا ... ودنيويا .... كما اعلن عن دعوتكم جميعا للمشاركة في حملتنا الجديد ..... حملة ......

" قــــــــــــــد اظــــــــلــــكــــم شــــــهــــــر "

وهي حملة ارجو ان تجد صداها ...علي صفحات المدونات ... وتهدف ... الي المشاركة ... والدعوة للاسهام في الخير ... فانا عندي يقين تام ... ان كل شخص ..وهبه الله ...مجالا معينا .. يتميز فيه من جوانب الخير .... حتي لو لم يكن الشخص يعلم هذا المجال ... ولكنه موجود فيه ... وكا ما ادعوكم اليه هو ان من يجد في عقله فكرة معينة للاجتهاد والتقرب الي الله - عز وجل - ... او ذكرا معينا ... او موقفا خاصا ... الا يحرمنا جميعا من مشاركته فيه .... وانصح نفسي واياكم بعدم الاستهانة باي من جوانب الخير في الدعوة اليها ... مذكرا نفسي ..و اياكم ان " بغيا " من بني اسرائيل ... دخلت الجنة ..في كلبا ... سقته ... وانقذته من العطش .

فيا اخواني الاعزاء ... ويا اخواتي الطيبات ... لا تحرمونا .. وتحرموا انفسكم من خير وفير ... وتذكروا ... " يجوز للمؤذن ..ان يؤذن للصلاة ...من غير وضوء " .... فيجوز لنا جميعا ان ندعو للخير ... حتي لو لم نكن نؤديه علي الوجه الاكمل ... فربما ... يوفقنا الله ... من خلال اعلاننا عنه ... الي الانخراط فيه .

واعلن لكم ان حملة " قد اظلكم شهر " .... تتكامل ... ولا تتقاطع مع الحملات الطيبة الاخري ... مثل .... " مين هيفطر السنة دي ... اكتر ؟ " .... وهي حملة طيبة ... وفق الله من دعا اليها الي كل خير ... واصدقكم ... انه كانت سببا في شحذ همتي ... وزيادة ما كنت اخطط له ... وانا هنا انتهز الفرصة لا سألكم الرأي والمشورة ..... هل تعتقدون ان اعطاء ... المبالغ المادية نقدا ... اكثر فائدة ؟ ... ام توزيعها في شكل " شنط رمضان " احسن ؟ ... انا لي رأي ... ولكني اري الجميع يرون عكسه .... لذلك اطلب منكم المشورة .

***

رسائل سريعة

***

  • شكرا لجميع اصدقائي الاعزاء ... الذين جائوا متأخرين في يوم " للبهجة " .... واعتذر لهم عن مغادرتي مبكرا في ذلك اليوم ... اسف جدا جدا ... جداااااا ... ولكنها ظروف العمل ...فآمل ان تقبلوا اسفي
  • حكمت المحكمة في الدعوة المقامة من المدون " شلاطة " ... و " المهندس " - ايوة انا " .... ضد كل من " فاروق عادل " ... و "كائن الإبداع .... محمد " ... بخصوص عدم مشاركتهم في يوم " للبهجة " ... بالبرءة في الشق الجنائي... نظرا لظروفهم الخاصة بالتنسيق .. - ربنا يوفقهم ويكرمهم في حياتهم الجامعية - .... وبخصوص التعويض المدني .... لازم يكتب كل واحد فيهم تدوينة .... مضحكة للغاية عن ذكرياتهم عن شهر رمضان .... بشرط اننا نقعد نضحك عليها ... لمدة ربع ساعة باكملها .... رفعت الجلسة .... محكمة .
  • هييييييييييييييييييييييييييييييه ...... وهنعمل ملتقي للمدونين هنااااااااااااااااااااااااااااااااا ...... ومفيش حد احسن من حددددددددد ..... انشاء الله هيكون اول ايام العيد .... تبعا لدعوة ... الاخ الصديق " ضايع " ... طبعا في واحد لو حضر ... يعمل حسابه ... انه مش هيقدر يرجع شغله في " جدة " .... هوه عارف نفسه .... عشان حاجتين ... اولهما اننا هنجيبله " فيزا .... اسد ...مش حاجة تانية " هنا وهنخليه معانا في " الرياض " .... ثانيا : عشان انا متغااااااااااااااااااااااااظ جدااااااااااااا من التنفيض اللي بينفضه .... علي فكرة ... هوه مش اسمه " أبو العريف " ولا حاجة
  • في اتنين مدونين نفسي اكلمكم عنهم من فترة علي اساس انهم من ...مبهجاتي البلوجرية الخاصة ... وهما ... مدون سياسي ... قد تتفق ... او تختلف معه ..في ارائه السياسية .... ولكن لا تستطيع ان تختلف علي موهبته التدوينية .... او قدرته علي التحليل والنقد ... وخصوصا في سنه المبكرة - 16 سنة -... واقصد الصديق " مخبر قمل دولة " صاحب مدونة ... " خمسة استعباط " ....وهو مدون ساخر ... من العيار الثقيل ...اتوقع ... ان تروه قريبا صحفيا ذو صيت واسع ... وهو يعلم رأيي فيه اكثر منكم ... ولكن ... ادعوكم لزيارة مدونته ... واعدكم .. انكم لن تملوا هناك فهو متعدد الاهتمامات ... وواسع الثقافة .
  • المدون الاخر ...مفااااااااااااجأة بكل المقاييس .... مدون في سن مبكرة فعلا - اعتذر عن ذكر عمره ... لانني عرفته عن طريق صديق مشترك ... ولست في حل ان اذكره - ... ولكن لو قمتم بزيارة مدونته .... ستدهشك ... قصص غاية في النضوج ... والتكامل ... اقصد الصديق المدون / إسماعيل ... صاحب مدونة " ان تكون اسماعيل وهدان " .... بصراحة ... طول ما في شباب مثل هؤلاء ... اطمئنوا علي مستقبل مصر .... حتي لو جابولها 100 حكومة "ذكية " ... واطول رئيس وزراء .... فهم يثبتون .... ان " بلدي العزيزة جدا .... مصر " .... " ولادة " ... ولم تعقم بعد
  • دخلت المدونة اليوم لاجدها ... نظيفة .... و " مرشوشة ميه " .... فتعجبت من السبب .... ولكن عرفت ان الاخت العزيزة / رانيا ليس فقيرا من يحب هي من قامت ... برش المدونة بالمياه في غيابي ..... فشكرا علي سؤالها الدائم وتفقدها لاحوال المدونة .... مش زي ..... ناس ....... تانية ..... معاهم رقم الجوال ... وحتي مش بيسألوا برنة ..... يا اخونا حد جاب سيرة " ..... الابداع " في حاجة ؟ ...... احسن حاجة في التدوين بتعرفك علي ناس بتحبهم ... ناس جدعاااااااااااااااااااااان جداااااااااااااااااااا .... وناس ....... بس الغريبة انك بتحبهم برضه ..... مقدرش انكر ده

اطلت عليكم .... وكل عام وانتم بخير ...... ولا تحرمونا فضل مشاركتكم في حملة " قد اظلكم شهر " ... ولا من صالح دعائكم .... تصبحوا دائما علي خير وسعادة ..... والسلام عليكم ورحمة الله وبركاته .

هناك 22 تعليقًا:

ليس فقيرا من يحب يقول...

السلام عليكم

شكلى اول تعليق

ليس فقيرا من يحب يقول...

حمد الله على السلامه

ايه الغيبه دى

كل سنه وحضرتك طيب ان شاء الله

تكون الامور مستقرة

ليس فقيرا من يحب يقول...

ربنا يجازيك خير ويجعل كلماتك

هذه فى ميزان حسناتك

وربنا يعينا على المشاركه

وبالنسبه لموضوع النقود ولا شنطه رمضان

فانا بافضل اعطاء المحتاج النقود

وهو يتصرف فيها حسب حاجته

ليس فقيرا من يحب يقول...

وبعدين شفت المدونه فله ازاى

عد الجمايل بئه ههههههههههههههههههههههههههههههه

كل سنه وحضرتك طيب وربنا يبلغنا رمضان

السلام عليكم

أبو العريف يقول...

ايه ده هو انا كل ما اجي الاقي رانيا هنا

انت فعلا شكلك منضفه المدونه ورشاها ميه

وراصه الكراسي


ازيك يا ليس فقيرا من يحب

أبو العريف يقول...

هندسه

ازيك يا باشا اخبارك

احب اقول خمس حاجات

اول حاجه اني جيت متأخر بسبب النت اللي استهبل يومها

ثانيا متشكر علي الدعوه الي اللقاء

وبعدين هي هتفرق معاك يا معلم

مانت موجود في الرياض


ثالث حاجه

هههههههههههههههههههههههههه

انا في حائل يا معلم مش في جده
هههههههههههههههههههههههههه

أبو العريف يقول...

نسيت اقولك

كل سنه وحضرتك طيب

ان شاء الله رمضان الجاي

اقولهالك من مصر يا عم الحج

وتليفوني هسيبهولك عالميييييييييل

Sharm يقول...

كل سنةوانت طيب

قلم رصاص يقول...

كل سنة وحضرتك طيب يابشمهدز

رمضان كريم

دمت في حفظ الله

amly يقول...

السلام عليكم
الاول احب اعتذر منك اخى المهندس لعدم وجودى يوم البهجة لكن ولله نسيت اليوم
مش يوم عشرة يعنى بس لما جه ما كنتش اعرف
معلش بنسى التواريخ ذاكرتى بجد سيئه
غير طبعا ظروف النت الجميييييييييييييلة الايام دى والسعادة اللى احنا فيها من القرارات الجديده
ارجوا ان تتقبل اسفى واعتذارى
ثانيا كل سنه وانت طيب وعائلتك كلها بخير ان شاء الله.. رمضان كريم
مقدرش مقلش كل سنة وانتم كلكم طيبين
الحمد لله انى افتكرت رمضان
مش حتصدق فى البيت لازم يفكرونى ...
بكرة رمضان يابنتى علشان الصيام

ذو النون المصري يقول...

كل عام انتم بخير
اعاد الله ايام رمضان علينا و عليكم بالخير و البركات

المهندس يقول...

الاخت العزيزة / رانيا .." ليس فقيرا من يحب "

كل سنة وحضرتك طيبة .. وفي اتم صحة واحسن حال

شكرا علي مرورك الدائم .. وزيارتك المستمرة

انا سمعت الكلام في حكاية " شنط رمضان " ... مع ان رأيي قلته في البوست الجديد

اه صحيح .. المدونة " بتبرق " من النظافة .. و " طراوة " من رش الميه ... ربنا يخلي حضرتك دايما مهتمة باحوال اخواتك المدونين ... ويزيدك من كرم اخلاقك

المهندس يقول...

ابو العريف .. العزيز

وانت طيب يا باشا ... والباقي ... تم التفاهم عليه بطريقتنا الخاصة

كل سنة وانت طيب ... ودايما في اتم صحة واحسن حال

المهندس يقول...

الصديق / sharm

وانت طيب وربنا يعود الايام علي حضرتك وانت في اتم صحة واحسن حال

المهندس يقول...

الصديق / قلم رصاص

وانت طيب يا باشا ... ودائما من نجاح لنجاح

والسنة اللي جاية نقرالك في الدستور ان شاء الله

المهندس يقول...

الاخت العزيزة / املي

كل سنة وحضرتك طيبة ... وفي اتم صحة واحسن حال

لا انكر اني زعلت عندما لم تشاركي .. لا حضرتك ... ولا احد من فريق " نهضة العرب " في يوم " للبهجة " ... ولكن اعتذارك ... محا هذا الحزن والزعل .

اتمني ان تشاركينا في حملة " قد اظلكم شهر " ... والا تحرمينا بغيابك عن مجتمع المدونين

اه متنسيش بكره صيااااااااااااااام ... عشان متقوليش انه مفيش حد فكرك ... اه صحيح ...الافطار بيكون عند المغرب ... لما المدفع بيضرب ... مع اني ما اظنش انك ممكن تنسي دي

شكرا والسلام عليكم

المهندس يقول...

الصديق / ذو النون المصري

وحضرتك بالف خير ... واتم صحة ... واحسن حال

اعاده الله عليك بالخير ... واليمن والبركات

amly يقول...

هههههههههه
كل سنة وانت طيب تانى اخى المهندس
الحمد لله انك فكرتنى انا كنت نسيت
جالى فزع لقيت الناس كلها بتقولى بكرة رمضان صومى
الحمد لله لحقت نفسى
المهم انى نسيت اشرب شاى
وطبعااللى بيفطر زيى على 3 شاى يعرف انا شكلى ايه دلوقت
المهم ربنا يتقبل مننا
بالنسبة لحملة " قد اظلكم شهر "
بلاش اوعد لحسن النوبة دى ما تدخلنيش المدونه
بس ححاول
انتم فعلا تدويناتكم رائعة انا حضيع بينكم
بس ححاول ان شاء الله
كل سنة وانت طيب

amly يقول...

اه نسيت كنت بتسأل ان موضوع شنط ولا مبالغ مالية فى رمضان
انا يمكن لى رايى مخالف
ان الشنط افضل
يمكن بحس انى ممكن احرج حد لما يبقى مبلغ مالى
لكن الشنط بتعتبر هديه اكتر منها اى شيىء تانى
اقولك زى مثلا زمان مش كانت العائلات بتهدى لبعض الحلويات وكحك العيد
وان اللى يعمل اكلة كويسه او جديدة يبعت للباقى
لاحظ انى بقوووووول زمان
بس ممكن مثلا ان الشنط تكون منوعة
تبقى مختلفة فى محتواها

محمود ابوالعزم يقول...

السلام عليكم ورحمة الله
انا أولا هشارك بجلمةتين كتبتهم عن رمضان
.......................
الصوم الحقيقي هو أن تشبع الروح من جوع الجوارح
..........................
ان القلوب التي لا تعرف معني الصوم ترى فيه حرمان ٌ من اللذة أما القلوب التي تعرفه فترى فيه لذة الحرمان
.............................
وبالنسبة لموضوع الشنط ولا المبالغ
الأحسن وعن تجربة
انك تختار رب البيت أو ربته
وتديهم مبلغ في ايده
هو ممكن يكون محتاج المبلغ ده لحاجة تانية غير الأكل
ايه فايدة الاكل وهو مش عارف يشتري علاج لإبنه مثلا
وكمان لاحظت ان فيه احراج وضرر للأسرة انهم ياكلوا من الشنطة دي وهما عارفين انها جاية تبرعات
يعني مجرد رأي
...............
عندي انا كمان حملة صغيرة أوي على المدونة
أتمنى تشاركونا فيها

المهندس يقول...

الاخت العزيزة / املي

وحضرتك طيبة وبالف خير دائما

انا برضه صمت اول يوم من غير ما اتسحر , عملت فيها ناصح وقلت ااخر السحور التزاما بالسنة .. وقلت للجماعة في مصر يرنوا عليا عند السحور ... صحيت الساعة 5:20 عشان الاقي 47 رنة من مصر ...

بالنسبة لموضوع " شنط " رمضان انا كان رأيي زي حضرتك ... بس جميع من استشرتهم اشاروا بان اخراجها " نقدا " فيه فائدة احسن فالتزمت براي الاغلبية

كل سنة وحضرتك طيبة ... ودائما باتم صحة واحسن حال

المهندس يقول...

الصديق / محمود ابو العزم

كل عام وحضرتك بالف خير واحسن صحة

تشرفت مدونتي المتواضعة بزيارة حضرتك ... وفكرتك عن تدبر الايات اكثر من رائعة ... جزاك الله عنها خيرا ... وان شاء الله هشارك فيها

اتمني دوام الزيارة ... ودوام الصداقة ...شكرا والسلام عليكم .