الاثنين، 31 أغسطس، 2009

مـــوجــز لاهـــم الانـــبـــاء :- خـــــبــر عـــاااااااااجـــل

ا.ش.ا - رويترز - اسوشيتدبرس - وكالات الانباء :- في خبر عاجل تناقلته وكالات الانباء ... تأكد - باذن الله - قيام " م/ع.ا. " صاحب مدونة المهندس - انا - بعمرة الي بيت الله الحرام يوم الخميس - باذن الله ومشيئته - ... وكانت عدة تقارير صحفية تحدثت عن قيامه بالعمرة خلال الاسبوعين القادمين نظرا لظروف عمله الجديد .. وقد اعلن " المهندس " عن اسعار الدعوات هناك - عشان هوه استغلالي - كالاتي :-
1- دعوة عادية ... بدون نفس ... 20 ريال
2- دعوة عادية ... بنفس ....... 30 ريال
3- دعوة ...... اسبيشيال ...... 40 ريال
4- دعوة ...... ممتازة ........ 50 ريال
ملحوظة :- يمكن قبول العملات الاخري حسب سعر الصرف الدولي في يوم الجمعة .
انتهي .... وسنواليكم بالتفاصيل في خدماتنا الاخبارية اللاحقة .. السلام عليكم
ددن ..دددن ... ددداااااااااااان ...دااااا .... ( تتر اهم الانباء )
***
بصوا ... انا هدعيلكم كلكم دعوات ممتازة ... - وهأبلغ كل واحد عليه كام - بس اوعوا تحاولوا تفاصلوا بعد رجوعي من العمرة ... انا يمكن ما اقدرش ادخل المدونة لحد يوم السفر ... لكن احب ان اطمئنكم .. انا قريب منكم جميعا ... وعارف هادعي ..لكل واحد بأيه .. في اللي هدعيله / لها .. بالتوفيق في العمل ... وفي اللي بالتوفيق لاختيار شريك للحياة يناسبه / ها ... وفي اللي بالتوفيق في حياته الجامعية ... وفي اللي يرجع لبلده بالسلامة .. - بعد ما يعمل المليون الاولاني بس - ... وفي باللي يبطل ندالة مع الناس ... وفي اللي بانه يبطل اكل " كشري " ويعقل ... ويبطل جنان ... وفي اللي هدعيله باني اشوف انتاجه الادبي الاول قريبا ... وفي باللي ربنا يوفقهم في دعواتهم الكريمة لعمل الخير ... ويجزيهم خير الجزاء عن ذلك ... وفي .... وفي ... هوه صحيح في 3 او اربع مدونين غامضين عليا - رغم مكانتهم العالية عندي - ومش هعرف ادعيلهم بايه بالتحديد ... لكن سادعو لهم بالتوفيق في كل مجالات حياتهم ... وعلي الله القبول .
***
اشكركم ... واعتذر عن قطع برامج المدونة ... من حملة " قــــــد اظــــــلـــــكــــــم شـــــــهـــــــر " .. و وعدي بالمشاركة في حملة انا حسيت بالآية دي النهاردة ... لبث هذا النبأ العاجل ... لكن حبيت انكم تعرفوا اني ساذهب للعمرة ... وللمرة الالف ... لا اعرف السبب في ذلك .
ملحوظة :- ادخلوا الزيارة الجاية للمدونة ... بالكمامات الواقية ... عشان محدش ياجيله دور برد ... فيتهمني اني انا السبب في اصابته
اتنمي ان تتقبلوا اللهجة الساخرة للبوست ... لكن حسيت اني من زمان ما استخفيتش دمي ... فقلت استخفه ... و ارفع ضغطكم شوية في شهر رمضان ... عشان ازود ثوابكم في الشهر الكريم .... السلام عليكم

هناك 32 تعليقًا:

ليس فقيرا من يحب يقول...

السلام عليكم

اول تعليق

ليس فقيرا من يحب يقول...

والتانى علشان خاطر

الايام الطيبه اللى احنا فيها

ليس فقيرا من يحب يقول...

التالت علشان اخونا م.ع

ليس فقيرا من يحب يقول...

الف مبروك وطبعا يا حج م.ع

لان عمرة رمضان كحجه

ربنا يباركلك يارب

يا سلام على الاستغلال الدعوة مسعره

ماشى

بص تدعيلى 10 دعوات ممتاز

ان شا الله ماحد حوش

هاتبعك بتفاصيل الدعوات لاحقا

ليس فقيرا من يحب يقول...

بص تدعيلى بتيسير الامور

وان ربنا يكتبلى الخير حيث كان

ويرضينى بيه

بص اختار شويه دعوات كده حلوة

على ما قسم

اوعى تنسانى من دعواتك فى الحرم

ربنا يوفقك يارب

فى حفظ الله

amly يقول...

تروح وترجع بالسلامة ان شاء الله
انا حبقى مستغلة جدا وعايزة دعوات فوق العادة
مش مهم الاسعار خااااااااااااالص
المهم انها تكون مركزة
مش حختار كله بينفع

فاروق عادل يقول...

كل سنه وحضرتك طيب اولا

عمرة مقبوله ثانيه

ادعيلى ونبى يابشمهندس كدة ان ربنا يوفقنى فى حياتى

قلم رصاص يقول...

السلام عليكم

ازيك ياهندزة

تروح وترجع بالسلامة وربنا يتقبل منك ان شاء الله

ودعوتين حلوين كده كادوه من جنابك لجنابي ساعتها انت اللي مفروض تدفعلي مش انا
عارف ليه

عشان هتاخد ثواب على قفايا

هههههههههههههههههه

كل سنة وانت طيب

زمان الوصل يقول...

عاوزه تشكيلة دعاوى بييجى خمسه و سبعين ريال و اتوصّى :) قصدى يعنى إدعى بنفس و حراره الله يكرمك ..

مخبر قمل دولة يقول...

اسمع يا باشمهندس
انا هاعرض عليك عرض اغلى من دا كله
تدعيلي دعوة فوق الممتازة .. بإخلاص حقيقي ( باتشرط بقا وداخل بقلب جامد.. مانا معايا عرض مش اي عرض :P ) وفي المقابل اضمنلك دعوة بنفس الدرجة من اللي احسن مني ومنك
من احد الملائكة
ادعيلي بالهداية والتوفيق وتحقيق كل احلامي ما صغر منها وما كبر
من قلبك بالله عليك يا باشمهندس
عمرة مقبولة بإذن الله وعقبالنا
احبك في الله

ذو النون المصري يقول...

الف مبروك
اوعي تنساني من دعاءك
كل سنه و انت بخير

ঔღঔ نـــوارة ঔღঔ يقول...

الف مبروووووووووك

ربنا يباركلك وترجع بالف سلامة :)

وانا بقى عاوزة 10 دعوات من الدعوات الممتازة والحساب عندي بس اتوصى شويتين تلانة ^ـ*

ياوويلك لو نستني :(

ادعيلي ربنا يرزقني بالذرية الصالحة :)

ربنا يوفقك يارب ويبعد عنك البرد والانفلونزا :]

دمت بحفظ الرحمن

أبو العريف يقول...

هههههههههههه

ربنا يتقبل يا هندسه

انت سبقتنا يا معلم

وانا لسه قاعد مستني الفرج

اللي هو عباره عن صاحبي محمد اسماعيل اللي متفقين من زمان اننا نعمل عمره رمضان سويا عشان اشوفه مشفتوش من رمضان اللي فات

وهو طبعا معطلنا باقامته وقضيته



وبعدين يا عم الحج انت هتدعيلنا ولا هتزلنا

(... وفي اللي يرجع لبلده بالسلامة .. - بعد ما يعمل المليون الاولاني بس - ... وفي باللي يبطل ندالة مع الناس .)

يا تري انا انهي دعوه فيهم

اوعي يكون الاتنين

المهندس يقول...

الاخت العزيزة / رانيا .. " ليس فقيرا من يحب "

استحالة انسي حضرتك ... واكيد هدعيلك ان شاء الله ... بالدعوات اللي طلبتيها وزيادة باذن الله

بس اوعي عند دفع الحساب تحاولي تفاصلي ... او تخليني اعمل تخفيض .. انت عارفة اني استغلالي

كل سنة وحضرتك طيبة ... وان شاء الله العام القادم انت اللي تدعيلنا هنا

السلام عليكم

المهندس يقول...

الاخت العزيزة / املي

حاضر ... علم .. وسينفذ .. بس لازم تاخدي قرض من دلوقتي لتسديد قيمة الدعوات ... لحضرتك ... ولباقي فريق " نهضة العرب " ... اللي نسيوني خالص ومفيش حد منهم بيسال ... بلغيهم .. اني باقولهم كل عام وهم بالف خير ... واني طبعا مش هنساهم في الدعوات

السلام عليكم

المهندس يقول...

الصديق والاخ العزيز / فاروق عادل

وكل عام وانت بالف خير .. وفي اتم صحة واحسن حال

وحاضر .. هدعيلك طبعا .. مكانتش محتاجة توصية منك ... لانك شخص عزيز علي قلبي ... رغم " التنفيض ..اللي بتنفضه " .

ان شاء الله موفق في جميع نواحي حياتك

صحيج ... بتكلم " محمد ..كائن الابداع " .. لو بتكلمه بلغه تحياتي .. لاني مش عارف اتكلم معاه

اه صحيح .. خلي بالك .. الدفع بمجرد الرجوع من العمرة .. عشان انا استغلالي .. زي ما انت عارف

السلام عليكم

المهندس يقول...

الصديق العزيز / قلم رصاص

انت هتحاول تفاصل من دلوقتي !!!! .. ما ينفعش يا معلم .. دا انت صحفي .. وفلوسك كتيييييييير " حبة قر " ولازم تدفع بالعملة الصعبة كمان

حاضر ياباشا .. انت تؤمر .. مع اني هدعيلك من ضمن الدعوات .. اني اقرالك في " الدستور " قريبا ... مش عارف ليه .. بس حاسس انك هتليق عليها باسلوبك وشجاعتك

السلام عليكم

المهندس يقول...

الاخت العزيزة / زمان الوصل

ياااااااااه .. عود احمد لرجوعك لزيارة المدونة ... اتاري المدونة منورة من ساعة ما دخلتها .. ومكنتش عارف السبب

عاوزة دعوات بـ 75 ريال بسسسسسس ... ايه البخل ده ؟؟؟ دا انتي في القطاع المصرفي كلللللللله ... " ده مش حسد ..ده قر بسسسسس "

حاضر ... علم .. وسينفذ باذن الله

السلام عليكم ... ولا تحرمينا من زيارات حضرتك

المهندس يقول...

الصديق العزيز جدا / احمد " مخبر .. الدولة "

اولا احبك الذي احببتني فيه

ثانيا : كل عام وانت بالف خير .. ودائما في اتم صحة واحسن حال

ثالثا : حاضررررررر ... باذن الله دعوة فوق الممتازة ليك ... بالتوفيق في كل احلامك ما صغر منها وما كبر .. ودعوة من عندي اني اشوفك صحفي عن قريب جدا ... - مش عارف ايه حكايتي مع الصحفيين ... انت ...وفاروق.. وقلم رصاص - شكلي كده هرجع مصر .. واخد ترخيص " جريدة " .. مشروع حلو متهيالي

بس ما تحاولش ... هتدفع .. يعني هتدفع .. متهيالي انت حسابك هيكون 150 ريال تقريبا

شكرا لزيارتك ... ولا تغيب عنا كثيرا ... السلام عليكم

المهندس يقول...

الصديق العزيز / ذو النون المصري

كل عام وانت بالف خير .. وتنعاد عليك الايام وانت في اتم صحة واحسن حال .. انت والاسرة الكريمة

وده برضه معقولة انسي حضرتك يا " ابو عمر " .. باذن الله سادعو لك ولعمر كمان ... بس دعوة عمر ببلاش ... لاسباب كتير - اكيد لاحظت الحرف الاول من اسمي ..زي عمر - لكن انت هتدفع يعني هتدفع ...مفيش حل..ههههه

السلام عليكم

المهندس يقول...

الاخت / نوارة

حاضررررر ... اول مرة اسمع عن الدعاء تحت التهيد - ياويلك لو نسيت - لاء مش هنسي ان شاء الله ... العمر مش " بعزقة "

ان شاء الله ربنا يرزق حضرتك بالذرية الصالحة ... ويسعدك بيهم ..

شكرا لدعواتك ... بس برضه هتدفعي تمن الدعوات لما هرجع - ان شاء الله - والمرة اللي جاية .. ابقي ادخلي بالكمامة .. عشان محدش يقول اني عديته

السلام عليكم .. ودمت حضرتك دائما بخير

المهندس يقول...

ابو العريف .. العزيز

ايوة هو " ذل " وبعدين الاسعار ليك انت بالذات " دبل " يا صديييييييييق

يا اخي بطل بخللللللل .. طبعا انت عارف انا باتكلم عن ايه ... بلاش بقية الناس تعرف .. ولا الموبايل كمان " لحق " الرسيفر " ... انا رأيي تفتح محل صيانة في البيت .. وتجيب " صديق " يبوظ بقية الحاجات .. زي التلاجة .. والبوتاجاز .. عشان تسيب البيت ... وتاجي الرياض

ان شاء الله .. تأدي العمرة ... بس حاول تعملها قبل العشر الاواخر ... لانه الزحام بيكون رهيييييييييب في العشر الاواخر .

ماله صاحبك ؟ خيرا ... ايه حكاية اقامته ... وقضيته دي ؟ ... اتمني ان تكون الامور كلها علي خير مايرام .. ولو في حاجة اقدر اقدمها ... ابقي بلغني ... هو موجود فين ؟ .. علي كل الاحوال .. انا هعرف منك التفاصيل

السلام عليكم

المهندس يقول...

اه صحيح .. انت لوحدك عرفت الدعوات بتاعتك ... احييك علي الذكااااااااء الشديد ... بس في دعوة ...مش هقول عليها هنا ... انت عارفها طبعااااااا... هي تقريبا هتكون زي اليومين دووووول .. ومش هقول اكتر من كده

سلالالالالالالالالالالالالالالالالالالالالام

الحسين محمود يقول...

بشمهندس
عمرة مقبولة إن شاء الله يارب
لا تنسانا من صالح دعائك
و لما أعرف السعر حبعت لك مع صدقي للي مسافر بعد العيد .. بس أبقى أستقبله أنت إستقبال رسمي حافل لأنه حيبقى جديد عندك

عمرة مقبولة إن شاء الله عقبال الحج و إن شاء الله عقبال لما نعتمر سوا

زمان الوصل يقول...

المدوّنه منوّره بناسها و زوّارها :)

أنا سبت القطاع المصرفى خلاص اعتبارا من تاريخه :) و بقيت فى القطاع الصناعى .. إهبدنى بقى كام دعوه كويّسين بمناسبة بدء العمل الجديد و يا ريت يكون فيه دعوه مجّاينه إن ربنا يسهّل المواصلات لحد ما أشترى السيّاره البخاريه اللىّ فى خيالى :)

المهندس يقول...

الصديق العزيز جدا / حسين محمود

تقبل الله منا ومنكم صالح الاعمال

اكيد يا باشا مكنتش هنساك ... هو انا اقدر .. خالص دعواتي لك بالتوفيق في كل حياتك .. وان يوفقك الله الي تحقيق كل امانيك .

هكون في انتظار " صدقي " بس بشرط يدفع حسابك اول ما ينزل من سلم الطيارة ... ربنا يجيبه بالسلامة .

وباذن الله ومشيئته .. نعتمر سوا ..ده هيكون شرف كبير ليا طبعا

شكرا والسلام عليكم

المهندس يقول...

الاخت العزيزة / زمان الوصل

خالص الدعوات لحضرتك بالتوفيق في عملك الجديد .. انا كنت هدعيلك بكده .. لاني عارف انك انتقلت لعمل جديد - زي حالاتي - من يوم 12اغسطس ..تقريبا .. صح ؟

بالنسبة للسيارة البخارية ... انا رأيي تجربي السيارة الصاروخية .. بتاعة " نور " في " ملف المستقبل " تقريبا كانت سرعتها 500 كم/ ساعة ...

كل سنة وحضرتك بالف خير ... السلام عليكم

ليس فقيرا من يحب يقول...

هههههههههههههههههههه

لا طبعا هافاصل الدعوة الممتازة

كفايه عليها 30 ريال

عمرة مقبوله باذن الله

Sharm يقول...

عمرة مقبولة

شباك موارب/منار يقول...

يارب يسرلك يارب
هو انا جيت متاخره ولا ايه؟
ويوصلك بالسلامه ويحميك يارب
مش هنطلب والله غير تعمم في دعائك وربنا يتقبل من حضرتك يارب

أبو العريف يقول...

عمره مقبوله يا هندزه وتوصل بألف سلامه

وخلي بقي حساب الدعوات

مع حساب الموبايل

والنت

وكله عالنوته

ليس فقيرا من يحب يقول...

عساك بخير يا هندسه